Bailiúcháin
Déan achomharc
Ó Oifig an Choimisinéara um Fhaisnéis Comhshaoil
Foilsithe
An t-eolas is déanaí
Is féidir leat achomharc ar líne a chur faoi bhráid OCEI más mian leat achomharc a dhéanamh in aghaidh cinnidh údaráis phoiblí maidir le d'iarratas ar rochtain ar fhaisnéis comhshaoil. Is é €50 an gnáthchostas a bhaineann le hachomharc a dhéanamh. Má tá cárta leighis agat - nó más cleithiúnach duine ag a bhfuil cárta leighis tú - is é €15 an costas.
Más duine nó tríú páirtí thú a mbeadh tionchar ag nochtadh na faisnéise comhshaoil lena mbaineann ort, is féidir leat achomharc a dhéanamh trí ríomhphost a sheoladh chuig info@ocei.ie
Beidh táille €15 le híoc. Ní féidir leat achomharc mar seo a dhéanamh tríd an suíomh gréasáin seo.
Sula ndéanann tú achomharc, cinntigh go bhfuil an méid seo a leanas déanta agat:
- Chuir tú iarratas faoi bhráid údaráis phoiblí ar rochtain ar fhaisnéis chomhshaoil (nó fianaise gur lorg an t-údarás poiblí níos mó ama chun d'iarratas a phróiseáil)
- Fuair tú freagra ón údarás poiblí sin maidir le d'iarratas
- Chuir tú iarratas faoi bhráid an údaráis phoiblí maidir lena chinneadh (athbhreithniú eatramhach)
- Fuair tú freagra eile ón údarás poiblí nach bhfuil tú sásta leis
Ní mór duit achomharc a chur faoi bhráid OCEI laistigh de mhí amháin i ndiaidh duit:
- faisnéis maidir le cinneadh an údaráis phoiblí faoi d'iarratas ar athbhreithniú inmheánach a fháil NÓ
- nuair a bheidh faisnéis maidir lena leithéid de chinneadh faighte agat - laistigh de mhí amháin i ndiaidh don údarás poiblí d'iarratas ar athbhreithniú inmheánach a fháil - mura chuir an t-údarás poiblí síneadh leis an méid ama a cheadaítear chun cinneadh a dhéanamh.
Má bhí imthosca speisialta mar bhonn le hachomharc déanach a bheith á dhéanamh agat, is féidir leat é sin a mhíniú san fhoirm ar líne.
Mura bhfuil na ceanglais seo á gcomhlíonadh agat, ní féidir le OCEI glacadh le d'achomharc. B'fhéidir gur mhaith leat tús a chur leis an bpróiseas an athuair trí iarratas nua ar rochtain ar fhaisnéis comhshaoil a chur faoi bhráid an údaráis phoiblí. Má roghnaíonn tú é seo a dhéanamh, moltar go míníonn tú don údarás poiblí go bhfuil a leithéid á dhéanamh agat ionas gur féidir leat, más gá, úsáid a bhaint as do cheart chun achomharc a dhéanamh.
Sula ndéanann tú achomharc, molaimid duit gach taifead a bhaineann leis an déileáil a bhí agat leis an údarás poiblí i ndáil leis an iarratas a bhailiú le chéile.
San áireamh sna taifid sin go hiondúil bíonn:
- D'iarratas ar fhaisnéis comhshaoil
- Aon chomhfhreagras ón údarás poiblí ina sonraítear go bhfuil síneadh curtha leis an tréimhse ama chun d'iarratas a phróiseáil
- Cinneadh an údaráis phoiblí maidir le d'iarratas
- D'iarratas ar athbhreithniú inmheánach ar an gcinneadh seo
- Cinneadh an údaráis phoiblí faoi d'iarratas ar athbhreithniú inmheánach
- Más cuí, fianaise go bhfuil tú incháilithe chun táille laghdaithe a íoc (cárta leighis)
- Más cuí, fianaise go bhfuil tú údaraithe chun achomharc a dhéanamh thar ceann duine nó daoine eile (lena n-áirítear cumann neamhchorpraithe nó duine dlítheanach cosúil le cuideachta)
Má tá leagan leictreonach de na taifid seo agat beidh tú in ann iad a uaslódáil. Mura bhfuil tú in ann é seo a dhéanamh, is féidir leat achomharc a dhéanamh ar líne agus na taifid a sheoladh chugainn trí ríomhphost nó tríd an bpost.
Is é €50 an gnáthchostas a bhaineann le hachomharc a dhéanamh. Má tá cárta leighis agat - nó más cleithiúnach duine ag a bhfuil cárta leighis tú - is é €15 an costas.
Priontáil an doiciméad PDF thíos agus seol chuig: Oifig an Choimisinéara um Fhaisnéis Comhshaoil (OCEI), 6 Ardán Phort an Iarla, Baile Átha Cliath 2, D02 W773.
